Candra Siwa Sanga Bumi - Ksatria Sukahet

Candra Siwa Sanga Bumi - Ksatria Sukahet

CANDRA SIWA SANGA BUMI

Om Swastiastu

Om Awignamm Astu Nama Sidham

            Paiketan pasemetonan Ksatria Sukahet (Keluarga Ageng Ksatria Dalem Sri Aji Kresna Kepakisan, Ida Bhetara Dalem Segening, Ida I Dewa Sumretta) kagambarin antuk lambang sane mapuspata inggih punika Candra Siwa Sanga Bumi. Manut ring candra sangkala, Candra Siwa Sanga Bumi nenten tiyosan meteges 1391. Tata cara ngartos angka puniki saking ungkur dados nyane 1931. Angka puniki pinaka pinanggal ring Karya Agung Mamungkah Tawur Balik Sumpah, Panyejeg Jagat, Nubung Pedagingan, Ngenteg Linggih Padudusan Agung Merajan Agung Sukahet sane sampun kemargiang ring warsa 2009 (Masehi) utawi 1931 (Caka). Pinaka lambang paiketan pasemetonan Ksatria Sukahet sejebag Bali, sahananing para pasemetonan ageng ritatkala karya agung punika rauh, ngayah, tangkil, ngaturang puja, sareng ngerastiti bhakti ring Ida Sang Hyang Widhi Wasa, Ida Bhetara Lelangit, sayan akeh rasa sane nyikiang soang-soang angga segilik-seguluk, pakedek-pakenyum, salunglung sebayantaka, suka-duka nika mawinan karya agung punika pinaka tonggak sejarah kesumanggeman keluarga ageng pasemetonan Ksatria Sukahet nuju jayaning tresna ring kawentenan kawitan Ida Bhetara Ida I Dewa Sumretta, Ksatria Dalem Segening, Ida Bhatara Dalem Sri Aji Kresna Kepakisan.

Candra Siwa Sanga Bumi puniki medasar antuk simbol meru tumpang lima, lingga yoni, keapit olih kampid, kalih pusaka, lan ring hulu sareng teben medaging murda sane mapiteges ageman Sang Buddha inggih punika Bajra.

1. Meru matumpang lima 

Kawentenan pelinggih meru tumpang lima sane wenten ring Merajan Agung Sukahet, Klungkung pinaka linggih Ida Bhetara Kawitan Ksatria Sukahet inggih punika nenten tiyosan Ida Bhatara Dalem Anom Segening. Pinaka pengiket ring parindikan pasemetonan Ksatria Sukahet sejebag Bali. Megenah ring utamaning angga Candra Siwa Sanga Bumi inggih punika Ida Bhatara Dalem Anom Segening pinaka leluhur, kawitan sane kasungsung olih para trah lan warih Dalem, Ida I Dewa Sumretta

 2. Lingga Yoni

Yoni puniki simbol sakti, Hyang Ibu (Sugra Pakulun) Ida Hyang Bhetari Dhurga Candra Bhaerawi sane sampun ngicen panugrahan wangkes bang ritatkala Ida I Dewa Sumretta sareng stri Ida sane mapesengan Ni Gusti Ayu Peling utawi kaloktah Ni Gusti Ayu Sukahet ngemargiang tata laksana nyumbah Ida Bhetari ring ulun Setra Pura Dalem Sakti Sukahet, dumogi riwekas embas sang putra lan putrid stata ngemolihang kerahayuan riwekas sekancan trah Ksatria Sukahet. Kawentenang aksara suci Ong ring tengah Yoni meteges simbol Lingga Siwa, keambil saking dasa aksara sane dados pangider bhuana Sa, Ba, Ta, A, I, Na, Ma, Si, Wa, Ya meringkes dados eka aksara tunggal Ongkara ngadeg. Dumogi para dewata sane megenang ring astadala ngicenin kerahayuan, dirgayusa, digjaya, kabinawa ring para angga semeton ageng Ksatria Sukahet. Lingga Yoni puniki pinaka proses penciptaan, sumber kesuburan, gemah ripah lohjinawi sane kearsa olih Ida Hyang Bhetari Dhurga Candra Bhaerawi lan Ida Bhatara Siwa Maha Guru. Warna bang ring tengah Yoni pinaka ciri wangkes bang utawi rah Trah Dalem keanggen paiketan pasemetonan Ksatria Dalem. 

3. Kampid Emas

Kampid pinaka pelindung, peneduh jagat, peneduh pasemetonan utawi pelindung para braya, pengayom masyarakat. Kawentenan trah Ksatria Sukahet puniki medue tugas inggih punika pelindung Sang Angawe Rat Ida I Dewa Agung Jambe rikala Ida madeg ratu ring Puri Semarajaya riwusan nyukjuk negtegang malih trah Ida Bhetara Dalem Sri Aji Kresna Kepakisan ring Bali ritakala kawentenang geger gumi ring Gegel. Seluir punika dados pengayom ring braya utawi masyarakat mapan tugas sang ksatria inggih punika pinaka tedung sane ngayom lan melindungi braya utawi masyarakat.

 4. Keris

Keris pinaka lambang kebudayaan tosan aji ring masyarakat nusantara, pinaka pinget, seselet, senjata. Seluir sang ksatria mahotama pastika madue seselet pusaka merupa, keris utawi tombak. Manut ring Candra Siwa Sanga Bumi kalih keris punika simbol ksatria (sugra pakulun) Ida Bhetara Dalem Dimade kesarengin Ida Bhetara Ida I Dewa Sumretta riwekas ring sapemadeg Ida Bhetara Ida I Dewa Agung Jambe pinaka Ratu kesarengin para Ksatria Sukahet Ida I Dewa Kereng, Ida I Dewa Peduwungan, Ida I Dewa Negara, make tiga Ksatria punika nenten tiyosan wantah putra-putra Ida Bhetara Ida I Dewa Sumretta pinaka pengabih linggih Ida Dewa Agung Jambe. Artefak sejarah kawentenang ring Puri Agung Semarajaya (Kerta Gosa) lan Puri Agung Denbencingah (Kantor Bupati klungkung). Mangda mesikian ngawe jagat rahayu dirgayusa ngewangun jagat. Tosning Ksatria Mahottama!

5. Murdha ring ulu lan teben

Murdha puniki nenten je wenten tiyosan medue hubungan hulu-teben sareng murdha ring hulu meru mas metumpang lima, yening rerehang ring pangider bhuana pinaka senjata saking Bhetara Rudra sane mapuspata Senjata Mosala. Taler mapiteges agem-ageman Kabuddhan mapan Siwa-Buddha tunggal Candra Siwa Sanga Bumi – Ksatria Sukahet.

Ksatria Sukahet - The Royal Dynasty of Dalem Sri Aji Kresna Kepakisan

Ksatria Sukahet - The Royal Dynasty of Dalem Sri Aji Kresna Kepakisan - Royal Family